Abakhokhela ugatsha lwabasakhulayo kuZanu PF, uMnu Lewis Matutu, uMnu Godfrey Tsenengamu loMnu Pupurai Togarepi baxotshiwe kulelibandla ngoLwesithathu ngemva kokwethesa umcebisi kaMongameli Emmerson Mnangagwa, uMnu Kudakwashe Tagwirei, amacala enkohlakalo.
UMatutu loTsenengamu batshele intathelizindaba ngoMvulo ukuthi uTagwirei kumele ebotshwe ngoba nguye ingqungquthela ebulala umnotho weZimbabwe ngenkohlakalo.
Bethese njalo umkhokheli wenhlanganiso yeGrain Millers Association of Zimbabwe uMnu Tafadzwa Musarara loMnu Billy Rautenbach owenkampani yeGreen Fuel amacala afanayo.
Kodwa inkokheli yeZanu PF ithethe isinqumo sokumisa uMatutu loTsenengamu ukuba ngamalunga ebandla okomnyaka udaba lwabo lusacwayisiswa, emhlanganweni wedale leZanu PF Politburo.
Lelidale lithe ngokwethesa uMnu Tagwirei labanye bakhe amacala, uMatutu loTsenengamu batshengise ukungahloniphi inkokheli yebandla.
Lithe lanxa lingavumelani lemisebenzi yenkohlakalo, kalisoze livumele amalunga ebandla esiya nganxanye.
Kusenjalo, umthethwandaba weHigh Court wethule isinqumo sokuthi umkamsekeli kaMongameli welizwe uMarry Chiwenga kamelanga abuyele endlini lapho okuhlala khona umyeni wakhe uMnu Constantino Chiwenga ngoba lokhu kungafaka impilo kaChiwenga engozini.
Umahluli uJustice Kwenda uthe njengomuntu owetheswa icala lokuzama ukubulala uMnu Chiwenga, akwenzi ukuthi uMubaiwa ayehlala laye.
Ngokunjalo, uthe kumele ahlale endlini kanina eGlern Lorne amacala akhe aze ephele ukuthoniswa.
Kudaba lokucela kwakhe ukukhululwa ngemali yesibambiso kwelinye njalo icala, umahluli uthe uzacwayisisa isicelo lesi ethule isinqumo sakhe ngoLwesihlanu.
UMubaiwa ubotshwe okwesibili ngoMgqibelo esetheswa icala lokuhlankala umlizane wabantwabakhe.