Inengi seliveze imbono ehlukeneyo ngezizatho zokumiswa umsebenzi okwesikhatshana okwenkokheli zogatsha lwabasakhulayo kuZANU PF ezethule amagama abantu abathi benza inkohlakalo.
Abanye baithi abasakhulayo laba bazithathele inyathelo lokuveza inkohlakalo kulelibandla bengathunywanga kodwa abanye njalo besithi mhlawumbe zikhona iziphathamandla zalelibandla ezibaxhasayo ukuthi baveze amagama abanye babo.
Emhlanganweni wedale lePolitburo yeZanu PF izolo ntambama, oMnu. Lewis Matutu, Godfrey Tsenengamu, lo Pupurai Togarepi bathathelwe ezinye izikhundla zabo kulelibandla, lanxa belokhu bengamalunga.
Intsha le yethese umcebisi kaMongameli Emmerson Mnangagwa, uMnu Kudakwashe Tagwirei, umkhokheli wenhlanganiso yeGrain Millers Association of Zimbabwe uMnu Tafadzwa Musarara loMnu Billy Rautenbach owenkampani yeGreen Fuel amacala enkohlakalo kumbe icorruption ngesilungu.
I politburo ithe lanxa ingasekeli inkohlakalo, kodwa ngokwethesa uMnu Tagwirei labanye bakhe amacala, abathathu laba batshengise ukungahloniphi inkokheli yebandla.
Ngaphambilini kokuxotshwa kwabatsha laba, uSithandekile Mhlanga weStudio 7 uxoxe lelunga lebandla leZANU PF uMnu. Joseph Tshuma othe usekela inyathelo lokuveza kwabo inkohlakalo.
