Abanye bathi ukuxotshwa kwenkokheli yabasakhulayo kuZanu PF ngemva kokuchothoza umcebisi kaMongameli Emmerson Mnangagwa uMnu Kudakwashe Tagwirei isithi nguye ingqungquthela ebulala umnotho welizwe ngenkohlakalo kuveza sobala ukuthi lelibandla alizimiselanga ukulwisana lokungethembeki.
UMnu Lewis Matutu loMnu Godfrey Tsenengamu basuswe ezikhundleni lidale leZanu PF Politburo ngoLwesithathu lathi kabamelanga babe lezikhundla kulelibandla okomnyaka owodwa olandelayo.
Lelidale liphinde lasusa njalo unobhala wabatsha uMnu Pupurai Togarepi esikhundleni lisithi uyekele uTsenengamu loMatutu bengcolisa ibandla ngokutshela intathelizindaba ukuthi uTagwirei uyisikhohlakeli labanye osomabhizimusi abalobudlelwano leZanu PF ababalisa uMnu Tafadzwa Musarara loMnu Billy Reutenbach.
Abanye bathi ukuxotshwa kwaboMatutu kungaba kuyikuqala kokudlephana kwenkokheli yeZanu PF.
“Kutshengisa ukuthi ibandla leZanu PF lilokhu liyi-national security risk ngodaba lokuthi kalibambananga lokuthi izenzo zalo zingenza kube lokungahlaliseki loba nini,” kutsho uDr. Nkululeko Sibanda, isikhulumeli somkhokheli weMDC uMnu Nelson Chamisa.
Owake waba nguSenator weTsholotsho njalo elilunga leZanu PF uMnu Believe Gaule yena uthe ubengasoze atsho ukuthi uyasola kumbe uyasekela ukuxotshwa kwaboMatutu.
Kodwa uthe uyasihlonipha isinqumo esithethwe yiZanu PF Politburo.
UMnu Gaule uchothoze abagcini bomthetho abagoqela amapholisa labemithethwandaba esithi yibo abanza inkohlakalo igxile impande ngokukhulula izikhohlakali mahlayana ngemva kokufumbathiswa.
