Ukuxotshwa kwenkokheli yabasakhulayo kuZanu PF ngemva kokuchothoza umcebisi kaMongameli Emmerson Mnangagwa, uMnu Kudakwashe Tagwirei isithi kumele abotshwe ngoba kunguye labanye ababili ababulala umnotho welizwe ngemisebenzi yenkohlakalo kukhanya sokwehlukanise amalunga alelibandla.
UMnu Lewis Matutu loMnu Godfrey Tsenengamu basuswe ezikhundleni zabo lidale leZanu PF Politburo lisithi bangcolise ibandla ngokwethesa uTagwirei amacala enkohlakalo kanye loMnu Tafadzwa Musarara loMnu Billy Reutenbach.
Kuxotshwe njalo umabhalane wabatsha uMnu Pupurai Togarepi. Phezu kwesigwebo sokuthathelwa amandla uTsenengamu lo Matutu bathiwe bayefundiswa indikimba yebandla esikolo se Herbert Chitepo School of Idelogy.
Kodwa uTsenengamu utshele intathelizindaba ukuthi kayi esikolo lesi kodwa okumele baye ngabamxotshileyo ngoba bengasayazi indikimba yebandla.
Amanye amalunga eZanu PF akhulume leStudio 7 angathandanga ukuqanjwa athi kavumelani lokususwa kwaboMatutu ezikhundleni.
Athi leli linyatheli elibi kakhulu ngoba liveza iZanu PF njengebandla lezikhohlakali ezisekela ubusela. Sixoxe locubungula ezombusazwe uMnu Effie Dlela Ncube.
