Inhlanganiso elawula ezenguqu elizweni eyeZimbabwe Football Association isikhuthazwe ukuba ingavumeli abadlali asebekhulile bedlala ezigabeni eziphansi ezibalisa uDivision 2 loDivision 3.
Ekhuluma ngesikhathi esipha isipho semendulo zombala wegolide lezesiliva eziphiwe inhlanganiso yeZIFA ngabanye bakhe abahlala phetsheya kolwandle, intathelizindaba yezemidlalo uSikhumbuzo Moyo, uthe labo bantu bacele ukuba afikise isicelo sokuba kuzigaba eziphansi kudlale abasakhulayo kuphela ukuze umdlalo wenguqu uthuthuke kweleZimbabwe.
Esephendula, umgcinisihlalo weZIFA koBulawayo uAllan Mpofu, uthe bayavumelana lalowo mcabango.
“Kungumbono omuhle ukuba kube lomthetho othi kusigaba sikaDivision 2 lakuDivision 3 kudlale abadlali abaleminyaka ethile njalo yinto esizayihlafuna kabanzi njengenkokheli,” kutsho uMpofu.
Umgcinisihlalo weZIFA Southern Region uAndrew Tapela laye uncome umbuno lo wathi bazaxoxisana ngawo kabanzi emhlanganweni ababa lawo minyaka yonke oweAnnual General Meeting.
Kusigaba sePremier Soccer League kulomthetho othi amaqembu kumele abhalise abadlali abahlanu abaleminyaka engaphansi kwamatshumi amabili loba nje kulensolo phezu kokuba malutshwane amaqembu apha labo badlali ithuba lokudlala.
Imendulo lezi ezivele kweleBhilithani zidingelwe izigaba ezibalisa esakoBulawayo, eseMatabeleland North, eseMatabeleland South, eseMidlands kanye lenhlanganiso yeNational Association of Secondary School Heads.
