Umnotho welizwe usumi ngamadolo osekubangele ukuthi abanengi bacabangele ukuthi mpela amaxuku abosomabhizimusi leziphathamandla zikahulumende ezaziwa ukuthi ngama cartel ngesilungu, yiwo abangela ukubhidlika komnotho welizwe.
Inkokheli yentsha yebandla le Zanu PF yethule amagama abantu okuthiwa yibo abahuquluza umnotho welizwe besebenzisa amaxuku la athiwa ngamacartels.
Amagama aqanjiweyo abalisa umcebisi kaMongameli Emmerson Mnangagwa, uMnu Kudakwashe Tagwirei, umkhokheli wenhlanganiso yabachola amabele, eye Grain Millers Association, uMnu Tafadzwa Musarara losomabhizimusi, uMnu Billy Reutenbach.
Ingcwethi ecubungula ezomnotho, uMnu. Rejoice Ngwenya uthi kumele kuguqulwe imithetho yelizwe ukuze abahuquluza umnotho welizwe babotshwe.
Lanxa umongameli Emmerson Mnangagwa ejezise intsha eqambe amagama abantu abacatshangelwa ukuthi yibo abahuquluzi benotho inengi kubandla le Zanu PF liyasola okwenzalayo.
Sixoxe lesiphathamandla sebandla leli, uMnu. Joseph Tshuma.
Kodwa usomabhizimusi wako Bulawayo, uMnu. Albert Mhlanga, ophatheke njalo kwezombusazwe, uthi ama cartel la ngabantu abanengi ngaphandle kwalabo abaqanjiweyo.
Udaba lwama cartel lolu soluze lwadida ingqondo zezisebenzi zikahulumende ezifana lomtshutshisi omkhulu, uMnu. Kumbirai Hodzi ovumileyo ukuthi mpela ama cartel akhona kodwa wathi kunzima ukubabopha ngoba besebenza leziphathamandla zikahulumende.
