Inani lezehlakalo zezidlova ezihlasela zihlome ngenkemba ezaziwa ngokuthi ngaMashurugwi likhanya selisehla.
Izigebengu lezi bezithwalise nzima otsheketsha begolide lezakhamizi njalo zigongode elinye ipholisa lafa kumaviki asanda kwedlula.
Abanye banakanela ukuthi zilobudlelano lezinye iziphathamandla zikahulumende yikho nje zibanjwa ngesandla esibuthakathaka.
“Sikhuluma nje ibandla leZanu PF liyaxabana phakathi kwenkokheli yalo labatsha. Okubangwayo yindaba yegolide, hatshi i-corruption” kutsho isakhamuzi senkabazwe uMnu Albert Mhlanga.
“Okwakhathesi bamile kodwa kabamanga. Sebesazana, ngakho sokunzima kubo ukuthi beqhubeke besenza ubudlwangudlwangu ngoba sebesaziwa.
Isiphathamandla sebandla leZanu PF uMnu Joseph Tshuma yena uthe abagcini bomthetho kumele baqinise isandla babophe izigebengu lezi njalo zigwetshelwe ukulengiswa.
Kodwa uthe akakukholwa ukuthi zilobudlelwano leziphathamandla zebandla lakhe.