Uhulumende sekhweze intengo yempuphu isuka ku$50 isaka le10kg isiya ku$70, emizameni yokuqeda ukusilela kwayo.
Sokulenyanga ezithile impuphu isilela ezitolo njalo ithengwa emkambo wensitha ngentengo ephezulu.
Ukusilela kwempuphu lokhu kuqale ekupheleni komnyaka odluleyo kulandela ukwehliswa kwentengo yayo nguhulumende esithi uzahlawula abayigayayo imali yokuvala indleko zabo, ama-subsidies.
Umphathintambo wezemali uMnu Mthuli Ncube uthi intengo ye$50 le ebikhona ibangele ukuthi abanye osomabhizimusi bathengise impuphu emkambo wensitha ukuze bathola inzuzo.
Umbuzo omkhulu ngothi njengoba uhulumende esekhuphule intengo yayo, isizatholakala na? Abanengi bathi bazayicela isivuthiwe.
Isiphathamandla senhlanganiso yeBulawayo Progressive Residents Association uMnu Melusi Moyo utshele iStudio 7 ukuthi inengi lizakufa ngendlala ngoba impuphu isidula kakhulu.
