Intengo yempahla ezitolo isikhwelile njalo kusukela izolo osekutshiye inengi lihlaba umkhosi lisithi kalisoze lenelise ukondla izimuli.
NgoMvulo usibalukhulu webabhanga lesizwe, ele Reserve Bank of Zimbabwe, uMnu. John Mangudya wethule umbiko oqakathekileyo olaya ukusetshenziswa kwemali, owe Monetary Policy.
Ngasikhathi sinye izisebenzi zikahulumende zengezelelwe iholo lazo. Akukacaci ukuthi kahle kahle kuyini okubangele ukukhwela kwentengo kodwa unobhala jikelele wenhlanganiso yezisebenzi, eye ZCTU, uMnu. Japhet Moyo uthi sokuyimvama ukuthi izisebenzi zingakhwezelwa iholo intengo ikhuphuke ezitolo.
Usomabhizimusi wako Bulawayo, uMnu. Edwin Ndlovu, ophatheke njalo kwezombusazwe, uthi zinengi izizatho ezingaba zibangele ukukhwela kwentengo.
Isakhamuzi sako Bulawayo, uNkosazana Sisa Mathe uthi impilo isinzima kakhulu ngenxa yokukhwela mahlayana kwentengo ezitolo okubalisa imbadalo yamakhombi.
Isikhulumeli senhlanganiso elwela ilungelo labathengi, eye National Consumers Rights Association, uMnu. Effie Dlela Ncube uthi okwenziwa ngabosomabhizimusi akulunganga.
Izisebenzi zikahulumende zikhwezelwe iholo ngesilinganiso esiphansi kulaleso ezazisifuna.
Inhlanganiso ye ZCTU ithi ilokhu imelele ukuthi uhulumende uzengezelela nini iholo njalo ngesilinganiso esinganani?
