Kulowesifazana oyisizalwane seZimbabwe ogcinwe esibhedlela seWilkins eHarare lapho ahlolwa khona igciwane leCoronavirus lona eselibulele abantu abazinkulungwane ezimbili kweleChina.
Obona ngezemikhuhlane etshiyeneyo kugatsha lwezempilakahle uDr. Portia Mananganzira utshele iStudio 7 ukuthi owesifazana lo uvele kweleChina ngoLwesibili lapho abesebenza khona.
Uthe njalo uke waba seWuhan, okuyisiqintini lapho okwaqhamuka khona lumkhuhlane. Kodwa uthe okwamanje akalazo impawu zawo.
Ukugcinwa kowesifazana lo sokutshiye inengi lingahlalisekanga eHarare linakanela ukuthi engaba elawo lumkhuhlane njengoba evela eChina.
“Uhulumende vele wayemele avimbe abantu beZimbabwe ukuthi baye eChina njalo labo abeChina wayemele abavimbe ukuza ezimbabwe umkhuhlane lo uze uphele,” kutsho isakhamuzi uMnu Charles Nyoni.
Inengi ikhala njalo ngokuthi ungavele uqhamuke lumkhuhlane eZimbabwe, ulakho ukuqeda abantu ngoba uhululemende ekhanya engelalo ikhono lokulwisana lawo, nanku ezibhedlela akulamithi lemitshina edingakalayo.
