amalinks wokungena

Breaking News

Ubekiwe Umsunguli weBlack Mambazo Wachazwa Njengeqhawe nguMongameli Ramaphosa Labanye


Owasungula iqembu leLadysmith Black Mambazo uJoseph Shabalala
Owasungula iqembu leLadysmith Black Mambazo uJoseph Shabalala

Owasungula iqembu lakweleSouth Africa elihlabela umculo weMbube eleLadysmith Black Mambazo, uJoseph Shabalala, ungcwatshiwe ngoMgqibelo edolobheni leLadysmith eMnambithi Kwazulu Natal.

UShabalala uphiwe umngcwabo weqhawe lamampela ebelidume ngephimbo lalo elimnandi emhlabeni wonke jikelele. UMongameli Cyril Ramaphosa imbala leziphathamandla zikahulumende wakhe labo bebekhona.

Izikhulumi ezigoqela abamasiko, abezombusazwe labaculi, zivumelene ukuthi yebo engabe eselele uMshengu kodwa imisebenzi yakhe izaphila ngokunaphakade.

Omunye wabaculi abakhulumileyo ngumfokaMadlokovu, uMbongeni Ngema, yena okhuthaze abasakhulayo ukuthi baqhubeke ngonyawo lukaShabalala njalo bengaze bawulahla umculo wembube.

“Shabalala mfowethu, lala qhawe lakithi. Siyeza siyakulandela… Ngiyayibonga linsizwa ethathe umculo wasemakhaya, umculo wembube; yawuthatha yawuvezela umhlaba. Liqhawe lelo,” kutsho uNgema.

Iqembu leBlack Mambazo lona eselikhokhelwa ngomunye wamadodana kaShabalala liphiwe ithuba lokumphelekezela ngengoma.

Lithe liphuma enkundleni iqembu leBlack Mambazo kwangena uMongameli Ramaphosa yena othe eleSouth Africa lilahlekelwe kakhulu.

“Ubeyindoda emadodeni. Ubengomunye wabaculi baseSouth Africa abalezicoco ezinengi. Bamlindele oJohhny Clegg, oJabu Kanyile, oMiriam Makeba, oLucky Dube nabanye abanengi bamlindele ukuthi afike,” kutsho uMongameli Ramaphosa.

Abaculi beZimbabwe ekade bekhona kulumngcwabo bagoqela iqembu leNdosakusa lona elihlabela isicathamiya njengeBlack Mambazo.

“Kithi thina he is a father, he is a mentor, he is a pastor, he is everything to us. He is a teacher. So, that’s why we are here si-crossa iJohannesburg size siyefika la Kwazulu Natal,” kutsho umkhokheli weNdosakusa uOscar Siziba.

UMandla Khumalo owelinye njalo iqembu leZimbabwe eIeMbizo laye ukhothamele uMshengu esithi iqembu labo lifunde okukhulu kuBlack Mambazo.

“Lala kahle qhawe lamaqhawe. Sifundile okuhle okunengi kakhulu kuwe. Uliqhawe langempela. Lala kahle uphumule. Lala kahle Mshengu. Siyathembisa ukuthi lokhu osibonise khona siyosala sikubambile,” kutsho uKhumalo.

UShabalala ubhubhe mhlaka 11 kulinyanga eseleminyaka yokuzalwa engamatshumi phose ayisitshiyagalombili, 78.

Wahlabela labaculi abadumileyo emhlabeni jikelele abagoqela uPaul Simon loDolly Parton wathola izicoco ezinhlanu zamaGrammy Awards leqembu lakhe.

Uhulumende waKwazulu Natal usehle wamemezela ukuthi kuzabunjwa ikolitshi lezomculo iJoseph Shabalala Isicathamiya Academy, ngenjongo yokuhlonipha uMshengu ngendima ayidlale emculweni wezembube eAfrica laphetsheya kolwandle.

UMongameli Ramaphosa laye ukufakazile lokhu.

please wait

No media source currently available

0:00 0:06:04 0:00

XS
SM
MD
LG