Izizalwane zeZimbabwe ziqhubeka ziyizo eziyilinganiso esiphezulu kunani labokuza abasebenza kweleBotswana ngokusemthethweni.
Kulabokuza abedlula inkulungwane ezinhlanu (5,347) abasebenza kweleBotswana ngokusemthethweni.
Kulelinani abayisilinganiso esiphose sifike ingxenye ekhulwini, 48.6%, ngabadabuka eZimbabwe. Inombolo lezi zimunyethwe kugwalo olubika ngenani labokuza abasebenza eBotswana oluphuma kathathu ngomnyaka.
UMnu Mthabisi Dube odabuka eZimbabwe njalo esebenzela edolobheni leGaborone uthi inani labantu abathola incwadi zokusebenzela kulelozwe ngokusemthethweni liya lincipha ngokuhamba kweminyaka.
“Abantu abanengi bayakhala ukuthi akulula ukuthola ama-permits. Lokhu futhi kuza ngesikhathi kutshengisa ukuthi eleBotswana lalo libhekane lokuswelakala kwemisebenzi. Kugcnono khona akufani lesikhathi kubusa uKhama, kodwa nje, imisebenzi ayitholakali,” kutsho uMnu Dube.
Inombolo zikahulumende zitshengisa ukuthi inani labokuza abasebenza eBotswana lehle lisuka phezu kwenkulungwane ezilitshumi lasikhombisa (17,286) ngo2010 lisiya kunkulungwane ezedlula kancane ezinhlanu kuphela, 5,347.
Oke waba kumsebenzi wokuncedisa abantu ukuthola amaphepha okusebenza eBotswana, uMnu Stanley Ncube, uthi ukwehla kwenani leli kuveza ukuguquka komumo elizweni leli.
“Ungakhangela, imsebenzi kayisatholakali njengakuqala, yikho inani labathola amaphepha selehlile, ungakhumbula ekuqaleni eleBotswana kade lingemuva ngoba labafundele okuthile, kodwa ngenxa yokuthi sebekhona abalama-qualifications, kutsho inani labokuza selisehla,” kutsho uMnu Ncube.
Noma nje ugwalo lukahulumende lolu luveza ukuba izisebenzi zakwamanye amazwe sezizinlutshwana eBotswana, kulenani eliphezulu labeZimbabwe elingena eBotswana ngokungekho emthethweni.
UMnu Nkazimulo Bhebhe uthi “Kulabanye abangena elizweni ngokungekho emthethweni, siyasazi sonke isimo ekhaya, ngakho laba ababalwanga kunombolo ezikhitshwe nguhulumende.”
AbeZimbabwe abasebenza eBotswana okusemthethweni bazinkulungwane ezedlula kancane ezimbili ezilengxenye (2,599).
Balandelwa yizizalwane zaseSouth Africa, zona ezingamakhulu ayisikhombisa, 700.
AbeZimbabwe abanengi basebenza ezigabeni zemfundo bengababalisi kuthi abanye bakugatsha lokwakha lolokulima.
Noma nje abeZimbabwe beyibo abahamba phambili ekutholeni amaphepha okusebenza eBotswana, lokhe kungalula ukuzithola incwadi lezi.
