Udaba lokuthi uMongameli Emmerson Mnangagwa uqoqa ukuhlangana lenkokheli yosiko eMatabeleland phezu kohlelo lokugebha amathambo abantu ababulawa yiGukurahundi ukuze bangcwatshwe kutsha soluphehle imbono etshiyeneyo.
Lanxa bekhona abathi ngempela abantu laba kumele bangcwatshwe kutsha, abanye bathi uMnangagwa kumele aqale akhulumisane lezihlobo zabo ngenhlawulo njalo axolise.
Abanye njalo bathi kumele abaphatheka kulumbuqazwe babotshwe bavalelwe entolongweni ukuze kube lokuxolelana okugcweleyo.
UMnangagwa uhlangane lezinye inhlanganiso ezizimeleyo zeMatabeleland koBulawayo kumaviki amabili adluleyo phezu kodaba lweGukurahundi lolu.
Khepha abanye bathi inhlanganiso lezi azikwazi ukukhulumela bonke abathinteka kubi yilumbuzazwe, wona obikwa wabulalisa abantu abaphezu kwenkulungwane ezingamatshumi amathathu eMatabeleland laseMidlands bebulawa nguhulumende kaMnu Robert Mugabe.
UMongameli Mnangagwa laye wetheswa icala lokuphatheka kulumbuqazwe.
Ingcwethi kwezombusazwe uMnu Effie Dlela Ncube utshele iStudio 7 ukuthi uMnangagwa kumele akhulume lababulawelwa izihlobo kuqala kanye lalabo abaphilayo abalimalayo, andubana akhulume ngokungcwaba kutsha labo abafayo.
