amalinks wokungena

Breaking News

Uhulumende Uvula Amavinkili Okuthengisela Amabutho Ngentengo Ephansi


Uhulumende uthi usesungula amavinkili okuthengisela abezomvikela abagoqela abacuphi, amabutho lamapholisa ukudla lezinye indingeko zempilo ngentengo ephansi.

Isinqumo lesi siphume emhlanganweni wedale labaphathintambo bakahulumende eleCabinet oqhutshwe ngoLwesithathu.

Umphathintambo wezemali uMnu Mthuli Ncube utshele intathelizindaba ukuthi akulalutho olumangalisayo kumbe olubi ngenyathelo leli ngoba kuyinto eyenzakalayo emazweni amanengi.

Uthe njalo uhulumende kajonganga ukwehlukanisa abantu kodwa uzama ukunakekela abezomvikela. UMnu Ncube wengeze wathi amavinkili anje ake abakhona elizweni esikhathini esedluleyo.

ICabinet ikhweze njalo intengo abalimi abathengisa ngayo umumbu yaya ku$6, 558 i-tonne eyodwa kwathi i-tonne yamabele yona ikhwele yaya ku$7, 260.

Ukusungulwa kwezitolo zamabutho lezi kuza ngesikhathi kulokusilela kwempuphu eZimbabwe njalo abantu abanengi bekhala ngokutshabalala komnotho.

Abanye bathi uhulumende engaba ezama ukuthabisa amabutho ngoba esesaba ukuthi angamgenqula embusweni njengoMnu Robert Mugabe.

“Nxa besithi sebevula amavinkili amabutho kuzakwenzakalani ematitsheni, ebantwini bonke abasebenzela uhulumende lakuye wonke umuntu weZimbabwe ngoba akusilo cala ukuthi umuntu wonke ekekho kubutho,” kutsho ocubungula ezombusazwe uMnu Zenzele Ndebele.

please wait

No media source currently available

0:00 0:02:07 0:00

Facebook Forum

XS
SM
MD
LG