Inhlanganiso yomanyano weUnited Nations ebona ngezempilakahle, iWorld Health Organisation, isibumbe isikhwama sokudinga imali yokuqhuba inhlelo zokulwisana lokumemetheka kwegciwane leCoronavirus emhlabeni jikelele.
Umqondisi weWorld Health Organization uMnu Tedros Adhanom Ghebreyesus wazise ngenyathelo leli ngoLwesihlanu.
Uthe badinga imali engangeUS$675 million ebantwini abanothileyo, kumankampani lakunhlanganiso ezizimeleyo.
“Singaphumelela kuphela ma singasebenzisana, umuntu wonke ulendima angayidlala,” kutsho uMnu Ghebreyesus.
Uzulu okhulume leStudio 7 ogoqela uMnu Collins Ncube uthe uyalijabulela leli nyathelo.
“Siyakunanzelela ukuthi thina njengeZimbabawe akulanto esesiyenzile ekuvikeleni ukumemetheka kweCoronavirus. Sikhuluma ngama borders, sikhuluma ngama airports, akula mizamo esingathi isiyenziwe nguhulumende wethu,” kutsho uNcube.
Imali le izasetshenziswa kunhlelo zokudinga umuthi wokwelapha iCoronavirus kanye lokunakekela abahlaselwe ngumkhuhlane lo emazweni wonke omhlaba.
Enye yalimali izasetshenziswa kunhlelo zokucubungula igciwane elibangela lumkhuhlane ukuze abezempilakahle bazwisise ukuthi laqala njani lokuthi lingenqatshelwa njani.
Omunye wabaphatheke kumkhankaso wePresent-Danger #Coronavirus Zimbabwe Campaign uNkosazana Esther Vongai Zimudzi ubonge iWorld Health Organisation ngokusungula lesi sikhwama esithi sizasiza kakhulu.
EleZimbabwe lalo likhangelelwe ukuthola usizo kusikhwama seCovid-19 Solidarity Response Fund lesi. Kuliviki uhulumende uphiwe imali engangeUS$25 million yiGlobal Fund eqondane lokulwisana leCoronavirus.
Lanxa ungakafiki eZimbabwe lumkhuhlane, uhulumende uthi kulabantu abafakwe ilihlo ngabezempilakahle ukuze babe leqiniso lokuthi kabalawo. Abantu laba bagoqela abangamatshumi ayisitshiyagalombili lanye koBulawayo.
Ekutshoneni kwelanga namuhla iCoronavirus ibisibulele abantu abangu5,604 emazweni atshiyeneyo.
Ezwekazi leAfrica isibulele abantu emazweni agoqela eleEgypt, Algeria, Morrocco, leleSudan. Emazweni afana leSouth Africa leNamibia isikhona kodwa abekho asebefile.
