amalinks wokungena

Breaking News

Asifuni Bumbulu: iHighlanders Itshela Abalandeli Abalobudlwangudlwangu


Bajamelene lamapholisa abalandeli beqembu le Highlanders

Iqembu le Highlanders selisole kakhulu izehlakalo zobudlwangudlwangu ezenzakale enkundleni ye Barbourfields ekupheleni komdlalo we Castle Challenge Cup ngoMgqibelo.

Inkokheli yeqembu le Highlanders ikhuphe umbiko isola kakhulu umsindo obekhona enkundleni ye Barbourfields lapho iqembu le Bosso ebelidlala khona lele FC Platinum kumncintiswano we Castle Challenge Cup.

Kube labalandeli abadale ukuba umdlalo umiswe okwesikhathi eside ngoba sebengene enkundleni bejikijela amapholisa ngamatshe kanye lensimbi ezisentshenziswa nxa kuthelelwa inkundla.

Kumbiko wakhe, umgcinisihlalo weqembu le Highlanders uKenneth Mhlophe uthe okwenzakale ngoMgqibelo akuphi isimo esihle ngomdlalo wenguqu kwele Zimbabwe njalo kulakho ukuxotsha abasekela amaqembu ngemali.

Kusenjalo, inhlanganiso ye Premier Soccer League layo isikhuphe umbiko isithi izethesa iqembu le Highlanders icala ngemva kwezehlakalo zangoMgqibelo.

Isikhulumeli seqembu le Highlanders uRonald Moyo, uthi iqembu lizasebenza gadalala ukuze liqede limvukuzane eyobudlwangudlwangu.

“Njengeqembu le Highlanders silokudana kakhulu ngalokhu okwenzakale ngoMgqibelo njalo sithanda ukuthatha lelithuba ukuba sikhulumisane labalandeli bebhola ukuba ubudlwangudlwangu abusizi ebholeni,” kutsho uMoyo.

Benza labo abafuna ukusekela amaqembu bahambele khatshana njalo thina njengeqembu sizazama ukuthi siphume lamaqhinga awokuba lokhu okwenzakale ngoMgqibelo kungaphindi kwenzakale futhi.

Iqembu le FC Platinum liphakamise inkezo ye Castle Challenge Cup okwesithathu iminyaka ilandelana ngemva kokutshaya ele Highlanders nge 2 ka nya njalo umdlali walo elimthenge lonyaka uSilas Songani nguye olitshayele emambuleni kabili.

Umqeqetshi weqembu le Highlanders uMark Harrison, uvumile ngemva komdlalo ukuba iqembu lakhe likhulelwe ngele FC Platinum.

“Indlela esidlale ngayo itshiyene kakhulu lendlela esidlale ngayo kumidlalo elandelwe yilo esiwudlale leqembu le FC Platinum.

Bengicabanga ukuthi konke kuhamba ngendlela kodwa umkhulu umsebenzi esibhekane lawo ngoba phakathi kwabadlali bethu bangaba babili kuphela abangaphakamisa isandla bethi bayazigqaja ngendlela abadlale ngayo namhlanje,” kutsho uHarrison.

Iqembu le Highlanders lele FC Platinum yiwo adibane ku final eye Castle Challenge Cup ngoba ele FC Platinum kuyilo eliphakamise isicoco seligi nyakenye ikanti ele Highlanders lona yilo eliphakamise inkezo yeChibuku Super Cup.

Lumdlalo ubutshengiswa ebulenjini kukhasi le Facebook elenhlanganiso ye Premier Soccer League njalo iziphathamandla zalinhlanganiso zithi ububukelwe ngabantu abedlula izigidi eziyisithupha.

please wait

No media source currently available

0:00 0:02:29 0:00


Facebook Forum

XS
SM
MD
LG