Bekuyisiphithiphithi emarenkini ngeSonto inengi elihlala emadolobheni ligada amabhasi lisiya emakhaya ukuyahlala khona phakathi kwamaviki amathathu alandelayo ngesikhathi uzulu engavunyelwa ukuhambahamba emizameni yokwenqabela iCoronavirus.
Kodwa abanye bathi kulengozi yokuthi ngokwenza lokhu abanye abangaba sebelomkhuhlane lo bengakwazi balakho ukuwumemethekisa emaphandleni.
"Kuyasethusa okunye okumangalisayo. Nxa sibabona besehla sihle sithi mayi babo!" kutsho ukhansila kaWard 13 eGwanda uMnu Miclas Ndlovu.
Kusenjalo abezinkonzo sebekhuthaze uzulu ukuthi elandele izixwayiso zikahulumende kanye lezabogatsha lwezempilakahle.
"Siyabonga ukuthi uhulumende umisile wathi abantu kabahlale ezindlini. Kumele abantu bekulalele lokhu njalo begeze izandla ngazo zonke izikhathi ngesepa," kutsho uMfundisi Useni Sibanda.
"Nxa uhulumende esithi hlalani emakhaya unceda thina. Umlandu wokuthi simise lumkhuhlane usezandleni zethu sonke."