Ukuvalwa kwelizwe ngenjongo yokwenqabela ukumemetheka komkhuhlane weCoronavirus kuqale phakathi kwamabili ebusuku namuhla njalo uhulumende uthi abantu kumele bahlale ezindlini lemakhaya.
Uthi njalo abazafunyanwa behambahamba mahlayana balakho ukujeziswa ngamasotsha lamapholisa.
UMongameli Emmerson Mnangagwa wazise ngoLwesihlanu ukuthi kuqala namuhla uzulu kuzamele ahlale ezindlini engayi ndawo okwamaviki amathathu alandelayo ukuze kwenqatshelwe ukumemetheka kweCoronavirus.
Umkhuhlane lo usubulele abantu abedlula inkulungwane ezingamatshumi amathathu, 33,400 emhlabeni wonke jikelele okugoqela oyedwa eZimbabwe uMnu Zororo Makamba.
Asebebanjwe lumkhuhlane eZimbabwe njalo bayisikhombisa.
Amabhizimusi amanengi azaba evaliwe ngaphandle kwalawo aqhuba inhlelo ezibalulekileyo kakhulu kuzulu afana labagaya impuphu.
"Sithunyelwe incwadi nguhulumende esazisa ukuthi njengoba sisenza umsebenzi oqakathekileyo kangaka, kumele siqhubeke sisemsebenzini," kutsho usomabhizimusi ogaya impuphi uMnu Abednico Bhebhe.
