amalinks wokungena

Breaking News

EleBotswana Lalo Selizavala Amasango Ngemva Kokutholakala Kwabathathu Belegcikwane leCoronavirus


FUmongameli Mokgweetsi Eric Keabetswe Masisi wele Botswana.
FUmongameli Mokgweetsi Eric Keabetswe Masisi wele Botswana.

EleBotswana selithethe isinqumo sokuthi lisungule uhlelo lwestate of emergency oluzaqala ngoLwesine.

Uhlelo lulo luzabona abantu bonke behlala ezindlini kulinyethela lokulwisana lokumemetheka kwegciwane lecorona.

Lokhu kulandela ukubanjwa kwabathathu abeBotswana abatholakale belomkhuhlane wecorona virus ngoMvulo.

Umongameli Mokgweetsi Masisi ubike lamuhla ukuthi ilizwe lakhe selizangena kusibanga se state of emergency, kuyindlela yokulwisana lomkhuhlane wecoronavirus.

UMasisi uthi, kulandela ukubanjwa kwabathathu belegciwane leli, isimo sesibi ngakho ubone kufanele ukuthi afake istate of emergency.

“Ukungenwa kwezizalwane zethu kanye labokuza bevela kwamanye amazwe alomkhuhlane lo, kusifake engozini njengelizwe. Ngakho, ngemva kokuxoxisana labanye, ngibone kufanele ukuthi ngifake istate of emergency, kuyindlela yokulwisana lomkhuhlane lo,” kutsho uMasisi.

Umphathintambo wezempilakahle kweleBotswana udokotela Lemogang Kwape ubikele umphakathi ukuthi kulabathathu asebebanjwe belomkhuhlane wecoronavirus.
“SilabeBotswana abathathu ababanjwe belomkhuhlane weCOVID-19. Kade bephumele phandle beye eUnited Kingdom le Thailand,” kutsho uKwape.

EleBotswana beselisele lingamanye amazwe amalutshwana kuzwekazi leAfrica, akade engakatholi abalegciwane lecorona.

Kulandela isinqumo sikamongameli Masisi sokuthi abantu behlale endlini okwesikhathi esingabekwanga, abanye abeZimbabwe abahlala kweleBotswana basevalweni.

Abafana lomnunzana Andreas Sibanda, bathi noma nje isinqumo se state of emergency sifanele, imsebenzi eminye ilakho ukuphela.

“Inyathelo esilithethwe nguhulumende kamongameli uMasisi yinto enhle ekuvikeleni umkhuhlane, kodwa kithi thina abavela phandle sekusiba kubi ngoba lemsebenzi isingasiphelela. Uma kunje uhulumende uyaqala ngokunakekela abakhe abantwana,” kutsho uSibanda.

Umongameli Masisi ubike ukuthi uhulumende wakhe usanakekela izizalwane zeBotswana, uma ekhangela labo abaphazamiswe kakhulu ngumkhuhlane weCOVID-19 emsebenzini.

UMnu. Mthabisi Dube esinye isizalwane seZimbabwe, uthi akulangeyinye indlela, kumele bamukele inyathela leBotswana.

“Inyathela esilithethwe yiBotswana liqakathekile kakhulu esikhathini lesi esikuso, kodwa ke kuyethusa ukuthi indaba zecorona zezifikile eBotswana. Kodwa sibonga ukuthi inkokheli isithethe inyathela elijengaleli, kodwa kuzabanzima kakhulu ebantwini ikakhulu ezikhwameni,” kutsho uDube.

Umongameli Masisi ubike ukuthi uhulumende wakhe uzazama ukuphathisa amakampani azalinyazwa kakhulu kwezebhizimusi ngenxa yokumemetheka kwecoronavirus.

Ngesikhathi kubikwa ukusungulwa kwe state of emergency, kulokhe kulamakhulu abeZimbabwe abavalelwe endaweni ezitshiyeneyo, kuyindlela yokuhlolisisa ukuthi abalamkhuhlane wecoronavirus.

IBotswana ivalela bonke abokuza abahlala kulelizwe, kanye lezizalwane zalo okwamalanga angamatshumi lane, uma zithe zangena zivela phandle kwelizwe.

XS
SM
MD
LG