Inani labantu asebebanjwe ngumkhuhlane weCoronavirus eZimbabwe selikhwelile laya kwabayisitshiyagalolunye.
Ugatsha olubona ngezempilakahle luthi kulowesilisa oleminyaka yokuzalwa engamatshumi amahlanu (50) ohlala eHarare obanjwe lumkhuhlane izolo ngemva kokwethekelela kweleBhilithani.
Umuntu lo uphenduke eZmbabwe mhaka 21 ngenyanga edluleyo.
Umkhuhlane weCoronavirus usubulele abantu abedlula inkulungwane ezingamatshumi amahlanu, 53,000 emhlabeni jikelele, okugoqela oyedwa eZimbabwe.
Uhulumende uthi elizweni lonke baphezu kancane kwamakhulu amathathu abantu asebehlolwe lumkhuhlane.
Le yinto esolwa kakhulu ngabanengi abathi uhulumende kumele engeze inhlelo zokuhlola uzulu ngoba kungenzeka ukuthi banengi abantu abalawo lumkhuhlane bengakwazi abaqhubeka bewuthelela abanye.
Uhlelo lokuvalwa kwelizwe ngenjongo yokwenqabela ukumemetheka kwalumkhuhlane lukhanya lungahambi kuhle ngoba abantu abanengi batshona beminyezelana kundwendwe zokudinga impuphu.
Lokhu kubangele ukubotshwa kwabantu abaphose bafike amakhulu amahlanu, 485, endaweni zelizwe ezitshiyeneyo izolo.
KoBulawayo ababotshiweyo bebegcinwe eCentral Police Station beminyene, okwenza kubelula kakhulu ukuthi bathelelane lumkhuhlane, kutsho olwela amalungelo oluntu uMnu Mbuso Fuwayo.
Imbiko yokukhwela kwenani labantu asebebanjwe yiCoronavirus eZimbabwe iza ngesikhathi uMongameli Emmerson Mnangagwa esesungule uhlelo lokucela iUS$2.2 billion eqondane lokulwisana lendlala leCoronavirus.
Khepha ingcwethi kwezenotho uMnu Masimba Kuchera utshele umsakazo weStudio 7 ukuthi kaboni itholakala yonke limali.