Amankampani asetshenziswa yizizalwane zeZimbabwe ezisebenza kwamanye amazwe, ukuthumeza imali ekhaya, afana leWestern Union leMoneyGram azaqala ukuvulwa namuhla ukuze abathunyezelwa imali yizihlobo labangane benelise ukuyifinyelela ngesikhathi lesi ilizwe liphakathi kohlelo lokuzivalela kwabantu ezindlini ngenjongo yokwenqabela ukumemetheka komkhuhlane weCoronavirus.
Izizalwane zeZimbabwe ezinengi zisebenza emazweni afana leSouth Africa, iMelika leBhilithani.
Usibalukhulu webhanga elikhulu lelizwe eleReserve Bank of Zimbabwe uMnu John Mangudya uthi amankamani aloluhlobo asebenzela emahofosini awo lasemabhanga azavulwa okwensuku ezintathu ngeviki ezibalisa ngoLwesibili, ngoLwesithathu langoLwesine.
Kodwa lawo asebenzela ezitolo azavulwa nsukuzonke. Inyathelo leli liza ngemva kokuvulwa njalo kwemikambo yokuthengisela izilimo elizweni efana loweMbare izolo, okuyisinqumo esithethwe nguMongameli Emmerson Mnangagwa.
Kodwa abanye bathi ukuvulwa kwamabhizimusi lokhu kwenyusa ingozi yokumemetheka kweCoronavirus. Sixoxe losomabhizimusi olenkampani egaya impuphu uMnu Abednico Bhebhe.
