Inhlanganiso ekhankasela ukulondolozwa kwamalungelo oluntu, iZimbabwe Lawyers for Human Rights isimangalele amapholisa lamasotsha emthethwandaba iwethesa umlandu wokuhlukuluza abantu ngalesisikhathi sokuvalwa kwelizwe ngenjongo yokuvimba ukumemetheka komkhuhlane weCoronavirus.
Inhlanganiso le ithi amapholisa lamasotsha ahamba engenela abantu emayadini abo ebahlukuluza ngendlela ezitshiyeneyo.
Ithi njalo abomthetho laba bazitshaya indiva iziqondiso zokuzehlukanisa, iSocial distancing, okwenza kube lengozi yokuthi bethelele abantu umkhuhlane lo.
Inyathelo leZimbabwe Lawyers for Human Rights liza ngesikhathi inkundla yeCITE ibika ukubana kulowesilisa ofileyo koBulawayo ngemva kokutshaywa ngamapholisa, esithi uphumeleni phandle.
UMongameli Emmerson Mnangagwa yena uveze izolo ukuthi amapholisa lamasotsha azaqinisa isandla sawo ukuze abantu bahlale ezindlini kulandelwa umthetho wokuvalwa kwelizwe okwamaviki amathathu.
Uhulumende uthi kulabantu abalitshumi lanye asebebanjwe umkhuhlane weCoronavirus njalo abathathu yibo asebatshona.
Kodwa isiphathamandla senhlanganiso elwela amalungelo oluntu eyeIbhetshu likaZulu uMnu Mbuso Fuzwayo bengaba banengi abantu asebefile ukwedlula inani elikhulunywa nguhulumende.
