Uhulumende uthi kulezizalwane zeZimbabwe ezingamatshumi amathathu ezifike elizweni ngoMvulo ngendizamtshina yeEthiopian Airways zivela emazweni atshiyeneyo ezihanjiswe eDarwendale eHarare, lapho ezizagcinwa khona okwesikhathi esithile zingakayi emizini yazo ukuze ziqale zibonakale ukuthi kazilawo na umkhuhlane weCoronavirus.
Isikhulumeli sikahulumende uMnu Nick Mangwana uthi abantu laba bagoqela umeli weZimbabwe kweleSudan uMnu Emmanuel Runganga Gumbo.
Zinengi izizalwane zeZimbabwe esezifakwe kuhlelo lunye ngemva kokuphenduka ekhaya zivela emazweni atshiyeneyo.
Edolobheni lePlumtree khona kulabantu abedlula kancane amakhulu amahlanu abagcinwe ePlumtree High School abavele kweleBotswana.
Kodwa abantu laba babikwa bengahlolwa ukuthi balawo yini umkhuhlane weCoronavirus kumbe hatshi.
Kusenjalo, uzulu endaweni ezitshiyeneyo zelizwe ubikwa eqhubeka ephuma ezindlini esiyadinga ukudla lanxa isizwe siphakathi kohlelo lokuhlala ngekhaya emizameni yokwenqabela ukumemetheka komkhuhlane lo.
Isiphathamandla senhlanganiso yeRural Communities Empowerment Trust uMnu Vumani Ndlovu utshele iStudio 7 ukuthi eLupane abantu batshona kundwendwe zokuthenga impuphu.
