Amapholisa athi asebophe abantu abazinkulungwane ezedlula eziyisikhombisa, 7,385 abatholakale behambahamba besephula umthetho wokuthi uzulu ahlala ngekhaya emizameni yokwenqabela ukumemetheka komkhuhlane weCoronavirus.
Embikweni awethule izolo ntambama amapholisa axwayise uzulu ukuthi ahlale ezindlini njengokutsho kukahulumende ngoba ukuphuma phandle okwenziwa ngabanye kusenza umsebenzi wokulwisana lomkhuhlane lo ubenzima.
Athe njalo azaqhubeka ebopha labo abazatholakala bebhodabhoda.
Isixwayiso lesi siza ngesikhathi abanye, ikakhulu abesilisa abahlala emaphandleni bebikwa besatshona bebhoda ngamatshwala bengagqize qhakala.
Abanye bawutshaya indiva umkhuhlane lo besithi ngowemazweni, ngakho awusoze ubahlasele.
Le yinto esolwa kakhulu nguDokotela Solwayo Ngwenya, ongumqondisi wesibhedlela seMpilo, othi abantu laba kumele bekunanzelele ukuthi umkhuhlane lo uyingozi njalo awukhethi.
