Obengumsekeli kamhleli wephephandaba leDaily News uMnu Gift Phiri uzabekwa namuhla emalibeni eWest Park koBulawayo.
Isiphathamandla senhlanganiso yeZimbabwe National Editors’ Forum uMnu Njabulo Ncube utshele iStudio 7 ukuthi uMnu Phiri uzalaliswa ngehola letshumi ekuseni.
UPhiri, obeyintathelizindaba edumileyo njalo ebisaziwa kakhulu ngobuciko bokuloba izindaba ngesiNgisi, ubhubhele esibhedlela eHarare ngeSonto.
Kusenjalo, Intathelizindaba ziphakathi kokukhala ngemva kokubhubha kwenye njalo intatheli uMnu Ray Matikinye, yena otshone langa linye loPhiri.
UMatikinye ubeyintatheli ehloniphekayo njalo ubikwa ewile nje esendlini yakhe kobulawayo wahle wathula.
Umufi wasebenzela amaphephandaba atshiyeneyo agoqela eleFinancial Gazette kanye leleDaily News.
Akukazakali ukuthi uMatikinye uzabekwa nini njalo ngaphi.