Kuqhamuke ukufuthelana okukhulu phakathi kwezizalwane zeZimbabwe ezingamatshumi ayisithupha lanhlanu eziphenduke elizweni zivela kweleBhilithani izolo leziphathamandla zikahulumende phezu kodaba lokuthi abantu laba kumele begcinwe ngaphi besahlolwa umkhuhlane weCoronavirus bengakayi emizini yabo.
Isikhulumeli sikahulumende uMnu Nick Mangwana uthi abantu laba baphiwe indawo zokuhlala eBelvedere Teachers College kodwa bala besithi bafuna ukuhlala emahoteleni.
Khepha abazi ngokwenzakalayo bathi abantu laba bebesala ukuhlala kulelikolitshi ngoba izambuzi zalo zingcolile kanti njalo amanzi awekho.
UMangwana uthi abantu laba bacine belala kuphela kulelikolitshi izolo belindwe ngamapholisa ukuze bengabaleki kumbe ukudala amacala. Akwaziwa ukuthi bazaqhubeka behlala kulindawo na kumbe bazadingelwa enye.
Uzulu weZimbabwe laye ungenele kuloludaba watshengisa ukwehlukana ngemibono enkundleni yeTwitter abanye bechothoza abantu laba kuthi abanye ngekade bebasekela besithi balelungelo lokuhlala endaweni ehlanzekileyo.
Isiphathamandla senhlanganiyo yeCitizens Covid-19 Monitor uMnu Effie Dlela Ncube utshele iStudio 7 ukuthi nxa kuliqiniso ukuthi abantu laba bafuna ukuhlaliswa emahoteleni, le yinto engalunganga.
Sixhume njalo igqwetha uMnu Dumisani Dube yena othi lanxa kulilungelo labantu laba ukuthi bahlaliswe endaweni ehlanzekileyo, umthetho wokuzama ukwenqabela ukumemetheka kweCoronavirus ufiphaza lelilungelo.