Ukubhubha kowesifazana obe ngumuntu wesine osebulewe ngumkhuhlane weCoronavirus eZimbabwe ngoLwesibili sokudale imibuzo eminengi phezu kohlelo lukahulumende lokuhlola abantu lumkhuhlane.
Umufi ngumama welunga leZanu PF elake laba ngumphathintambo kahulumende uMnu Silvester Nguni.
Ubeseleminyaka yokuzalwa engamatshumi ayisitshiyangalombili lambili njalo ubhubhele esibhedlela seWest End eHarare. Ubikwa ebekwe izolo emzini wakhe eMhondoro, eMashonaland West.
Ekugeleni kwakhe, imuli yakhe ibikwa imuse esibhedlela seWest End ngoba yayingacabangeli ukuthi engaba eleCoronavirus.
Isibhedlela lesi asilanhlelo zokwelapha kumbe ukwamukela izigulane zalumkhuhlane.
Ugatsha lwezempilakahle luthi ugogo lo waqala ukukhwehlela ngeviki edluleyo mhlaka 16 kwathi mhlaka 19 kwamqinela wasethwalelwa eHarare lapho abeWest End abafika bamfaka yedwa ngoba benakanela ukuthi uleCoronavirus.
Kodwa umbuzo obuzwa ngabanye ngowokuthi kungani abezempilakahle eMhondoro bamekela yena wayevele elempawu zeCoronavirus?
Bona abazempilakahle laba abambona eqalisa ukugula bamelapha bezivikele na?
Umeli weSoutherton edale lephalamende, uMnu Peter Moyo utshele iStudio 7 ukuthi kasuthiseki ngendlela uhulumende aphatha ngayo lumkhuhlane.
Kunjalo nje, isakhamuzi seHarare uMnu Charles Nyoni zithi ukubhubha komuntu lo kwethuse izakhamizi zalelidolobho ezinengi.