Asebebulewe ligcikwane le coronavirus abadabuka eZimbabwe behlala kwele Bhilitane sebesedlula amatshumi amathathu, 31, inengi labo lingabasebenza kwezempilakahle.
Kubikwa bengamatshumi amabili, 20, abasebenza kwezempilakahle kuthi abalitshumi lanye, 11 bengabantukazana asebekhulile kumbe abakade bevele belezinye izifo phambilini bacobodiswa yigcikwane lecoronavirus.
Emhlabeni jikelele asebebhubhile sebesedlula inkulungwane ezingamakhulu amabili, 202 098.
EZimbabwe belokhu bebane nje kuphela.
Kunjalo nje, izisebenzi zedolobho le Victoria Falls seziumiswe umsebenzi kulandela uhlelo lokuvalwa kwelizwe kusesatshelwa ukumemetheka kwegcikwane le coronavirus.
Imisebenzi eminengi yedolobho le Victoria falls igxile kwezokwethekelelwa kwelizwe.
Sixoxe losebenza edolobheni leli, uMnu. Ephias Mambume njalo engukhansila walelodolobho.
