Inhlanganiso ezizimeleyo zithi lanxa ukuvalwa kwelizwe ngenjongo yokwenqabela ukumemetheka kweCoronavirus kuyinto elungileyo, inyathelo leli selibangele ukuthi inengi lihlaselwe yindlala.
Umkhuhlane lo uthole ilizwe livele lisendlaleni njalo kulabantu abaphose bafike kuzigidi eziyisitshiyangalombili abadinga ukuphathiswa ngokudla emaphandleni lasemadolobheni.
Kodwa khathesi umumo ubikwa ususiba mubi ngamandla ngoba abantu abanengi abasayi emsebenzini njengoba kuvaliwe.
Isiphathandla somkhankaso ophathisa uzulu wakoBulawayo ngokudla owe“I am for Bulawayo Against Covid-19” uMnu Useni Sibanda uthi umangoye uselala eziko ezindlini ezinengi.
Kusenjalo, iqula lenkokheli yebandla leMDC lithi livakatshele inkamba ezimbili ePlumtree lapho okugcinwa khona izizalwane zeZimbabwe eziyabe seziphendukile elizweni zivela kweleBotswana ukuze zingahlangani lomphakathi zingakahlolwa igcikwane leCoronavirus.
Umgcinisihlalo walelibandla ezansi yeMatabeleland uMnu Solani Njemnyama Moyo utshele iStudio 7 ukuthi abantu abatholakala enkambeni lezi bavela endaweni zelizwe ezitshiyeneyo.