amalinks wokungena

Breaking News

Amanye Amankampani Ayehluleka Ukuvula Ngoba Kenelisi Ukubhadalela Ukuhlolwa Kwezisebenzi Zawo iCoronavirus


National Railways of Zimbabwe says the company needs to be recapitalized to lead the country’s economic recovery from its base in Bulawayo, Nov. 21, 2018, as some of its equipment has lived beyond its economic life span.
National Railways of Zimbabwe says the company needs to be recapitalized to lead the country’s economic recovery from its base in Bulawayo, Nov. 21, 2018, as some of its equipment has lived beyond its economic life span.

Lanxa amankampani amanengi esevuliwe, amanye abikwa elokhu evalile ngoba esehluleka ukugcwalisisa imilayo ebekwe nguhulumende ephathelane lokwenqabela ukumemetheka komkhuhlane weCoronavirus.

Uhulumende wazise ngeviki edluleko ukuthi amankampani asengavulwa kuqala izolo kodwa aphoqelelwa ukuthi athathe amanyathelo okulondoloza impilakahle yezisebenzi zawo.

Ngokunjalo, uhulumende uthe kumele athengele izisebenzi zawo impahla zokuzivikela njalo azihlozwe lumkhuhlane.

Kodwa umkhokheli wenhlanganiso emela amankampani eyeEmcoz uMnu Israel Murefu utshele lumsakazo ukuthi abaqhuba umsebenzi wokuhlola babiza imali ephakathi kweUS$25 kusiya kuUS$100, okuyimali athi inengi kakhulu njalo amanye amankampani akayenelisi.

Omunye wabosomabhizimusi uMnu Abednico Bhebhe yena uthi uhulumende ubemele aphathise amankampani kudaba lokuhlola izisebenzi.

“Lokho okokuthi abantu bahlolwe kuyathengiswa, akuphiwa mahala,” kutsho uMnu Bhebhe. “Alubana uhulumende esithi uzanika amankampani lawo ma-testing kits, bekuzaba ngcono.”

Amazwi kaBhebhe agcizelelwe yingcwethi kwezenotho uMnu Reggie Shoko.

“Ama-price abizwa yilabo abahlolayo, ama-private testing facilities bafuna imali eqala khonapho kuboUS$35 kusiya kuboUS$75. Inengi kakhulu limali,” kutsho uMnu Shoko.

Inhlanganiso emela izisebenzi eyeZCTU yona ixwayisa izisebenzi ukuthi zingavumi ukuya emsebenzini nxa zingavikelekanga.

Abaphila ngokuthengisa ezitaladeni bona balokhe bengakavunyelwa ukuqala umsebenzi.

UMongameli Emmerson Mnangagwa wazise ngoLwesihlanu ukuthi uhulumende uzaphathisa amankampani aphazanyiselwe umsebenzi yiCoronavirus ngemali engange ZWL$18 billion.

Enengi yalimali izakuya kumabhizimusi aqhuba umsebenzi wokulima kuthi enye iye kumabhizimusi amakhulu lamancane aqhuba eminye imisebenzi etshiyeneyo.

Umkhokheli wenhlanganiso yeBulawayo Vendors and Traders Association uMnu Aleck Ndlovu uthe abaphila ngokuthengisa kumele labo baphathiswe ngemali enengi ngoba belahlekelwe yibhizimusi enengi kakhulu.

“Kumele sibe lesabelo sibili esithe thuthu ukwenzela ukuthi lathi sincediseke ngoba silahlekelwe kakhulu,” kutsho uMnu Ndlovu.

Ingcwethi ecubungula ezenotho uMnu Masimba Kuchera yena utshele iStudio 7 ukuthi imali le kumele yabiwe egcekeni njalo itholwe yilabo abadinga incedo.

“Ngokubona kwami kumele kube le-transparency kubonakale ukuthi amankampani azayithola limali yiwaphi lokuthi imali leyo azayisebenzisa njani,” kutsho uMnu Kuchera.

Ukuvulwa kwamankampani lokhu sokubangele ukuthi abantu labo bagcwale emadolobheni, okuyinto abezempilakahle abathi ilakho ukubangela ukumemetheka kweCoronavirus kalula.

please wait

No media source currently available

0:00 0:04:36 0:00

XS
SM
MD
LG