Umthethwandaba weHigh Court ngoLwesihlanu uvimbe uhulumende ukupha ibandla leMDC-T elikhokhelwa nguNkosazana Thokozani Khupe izigidi eziyisikhombisa zamadola, Z$7,5 Million, emele iye kuMDC Alliance ekhokhelwa nguMnu Nelson Chamisa.
Ibandla likaChamisa yilo elikhweze udaba lolu enkantolo ngoba uMaKhupe esithi imali le kumele iye kubandla lakhe kulandela isinqumo seSupreme Court esokuthi nguye owayemele akhokhele ibandla ngemva kokufa kukaMnu Morgan Tsvangirai, hatshi uMnu Chamisa.
Umahluleli weHigh Court uMunangati Manongwa unqume evumelana leMDC Alliance ukuthi akumelanga imali le iphiwe yiloba yiliphi ibandla ngaphandle kweMDC Alliance.
UManongwa uphe njalo umphathintambo kahulumende obona ngezemali lowezemithetho amalanga alitshumi ukuthi baphikise isinqumo sakhe nxa befuna.
Imali le iphiwa amabandla alamalunga ephalamende amanengi nguhulumende phansi komthetho wePolitical Parties Finances Act njalo esikhathini sonke lesi ibivele isiya kuMDC Alliance.
Kodwa uMaKhupe useyifuna laye ngoba esithi amalunga edale lephalamende akuMDC Alliance kaChamisa ngawakhe. Kuliviki uxotshise amanye awo kuleli dale.
Ingcwethi kwezombusazwe uMnu Effie Dlela Ncube utshele iStudio 7 ukuthi uvumelana lesinqumo somthethwandaba ngoba amalunga asephalamende engaweMDC Alliance hatshi iMDC-T.
