amalinks wokungena

Breaking News

Inani Lasebebanjwe iCoronavirus eZimbabwe Selikhwelile Laya Kwabangamatshumi Amane Lambili


Inani labantu asebebanjwe ngumkhuhlane weCoronavirus eZimbabwe likhwele ngabantu abane ngoLwesihlanu laya kwabangamatshumi amane lambili, 42.

Ugatsha lwezempilakahle luthi abafunywanwe belomkhuhlane lo babalisa oyedwa oweMashonaland East, ababili abeMashonaland West kanye loyedwa ohalala eHarare.

Asebebulewe ngumkhuhlane lo balokhu bebane kuthi asebesinde kuwo labo balitshumi lantathu. Lokhu kutsho ukuthi abalokhu belawo lumkhuhlane bangamatshumi amabili lanhlanu, 25.

Emhlabeni wonke jikelele umkhuhlane weCoronavirus usubulele abantu abedlula inkulungwane ezingamakhulu amathathu, 304,000 njalo wahlasela abedlula izigidi ezine, 4,5 million.

EZimbabwe sokuleviki inani labalomkhuhlane lo likhuphuka phose nsuku zonke.

Lokhu kwenzakala ngesikhathi uMongameli Emmerson Mnangagwa ekhangelelwe ukwazisa uzulu yiloba nini kungakafiki ngeSonto ukuthi uhlelo lokuvalwa kwelizwe luyaqhubeka na kumbe uyayekethisa.

Isiphathamandla senhlanganiso elwela amalungelo oluntu eyeIbhetshu likaZulu uMnu Mbuso Fuzwayo utshele iStudio 7 ukuthi sokusobala ukuthi banengi kakhulu abantu abaphethwe yiCoronavirus eZimbabwe.

please wait

No media source currently available

0:00 0:02:23 0:00

XS
SM
MD
LG