Abesifazana bebandla leMDC Alliance abathathu abathunjwe kumaviki amabili edluleyo batshaywa kakubi ngabantu abanakanelwa ukuthi ngabacuphi izolo betheswe icala lokubuthana ngokungekho emthethweni ngenjongo yokubangela udlakela kanye lelokuphazamisa ukuthula.
Abathathu laba, abayiziphathamandla zogatsha lwabasakhulayo kuMDC, ngumeli weHarare West edale lephalamende uNkosazana Joana Mamombe, uCecilia Chimbiri loNetsai Marova.
Akukaziwa ukuthi bazamiswa nini emthethwandaba. Okwamanje balokhu belaliswe esibhedlela eHarare lapho abelatshwa khona amanxeba okutshaywa lokuhlukuluzwa ngokocansi ngabathumbi babo.
Inhlanganiso yamagqwetha abamelayo eyeZimbabwe Lawyers for Human Rights ithi abathathu laba betheswa njalo icala lokwephula imigoqo yokwenqabela ukumemetheka kwegciwane leCoronavirus.
UMamombe labanye bakhe bathi bathathwa ezandleni zamapholisa ngemva kokubotshelwa ukutshengisela eWarren Park bayatshaywa batholakala eBindura ngemva kwamalanga ambalwa belimele.
Uhulumende uthi usadingisisa ngaloludaba. Kodwa iMDC Alliance ithi uhulumende ulesandla kulokhu.
Igqwetha uMnu Dumisani Dube utshele iStudio 7 ukuthi ngokubona kwakhe, umthethwandaba uzathola abasolwa bemsulwa ngoba ukutshengisela abakwenzayo kuvunyelwe kusisekelo sombuso welizwe.
Kusenjalo, intathelizindaba ezimbili ezibotshwe ngoLwesihlanu ngesikhathi zizama ukuyakhuluma loMamombe labanye bakhe esibhedlela, uFrank Chikowore loSamuel Takawira bakhuluwe yinkantolo izolo ngemva kwamalanga amane besesitokisini.
Umantshi ukhulule ababili laba ngemali yesibambiso, ibali. Uthe kumele baphenduke emthethwandaba mhlaka 15 ngenyanga ezayo.
UChikowore loTakawira betheswa umlandu wokwephula umthetho wokwenqabela ukumemetheka kweCoronavirus.
Ukubotshwa kwabo kusolwe kakhulu ngabantu abanengi abagoqela olwela amalungelo uMnu Charles Nyoni.