Kubhubhe umuntu wakuqala ngomkhuhlane weCoronavirus eMatabeleland South izolo, okubangele ukuthi inani lasebebulewe yilesi sifo eZimbabwe likhuphuke liye kumatshumi amabili, 20.
Ugatsha lwezempilakahle luthi umufi ubengumntwana. Luthi njalo abantu ababanjwe lumkhuhlane izolo bangamatshumi amathathu.
Lokhu kukhuphule inani labantu asebebanjwe lumkhuhlane elizweni laya kunkulungwane elamatshumi ayisithupha lane, 1064.
Abalitshumi lane babantu laba ngabavele emazweni abalisa eleSouth Africa, Botswana, Lesotho kanye leZambia. Abalitshumi lasithupha ngabathole lumkhuhlane elizweni.
Abafunyanwe sebesindile izolo bangamatshumi amahlanu lambili. Abangamatshumi amane lasitshiyagalolunye babo yizakhamizi zakoBulawayo kuthi abathathu ngabeMatabeleland North.
Uhulumende wazise izolo ukuthi useqinisa iziqondiso zokuvalwa kwelizwe emizameni yokwenqabela ukumemetheka kwalumkhuhlane.
Wazise njalo ukuthi izikolo aziseyikuvulwa mhlaka 28 kulinyanga. Kodwa uthe imihloliso izaqhubeka.
Umphathintambo obona ngokwethulwa kwemibiko uNkosikazi Monica Mutsvangwa utshele intathelizindaba ukuthi izinqumo lezi zithethwe lidale labaphathintambo izolo.
UMongameli Emmerson Mnangagwa ukhangelelwe ukwethula uhlelo lokuqinisa uhlelo lokuvalwa kwelizwe yiloba nini.
Umgcinisihlalo wenhlanganiso yeBulawayo Progressive Residents Association uMnu Ambrose Sibindi utshele iStudio 7 ukuthi ukukhwela kwenani labafayo lababanjwa lumkhuhlane kuyethusa.
