Kulabantu abanengi abakade bezama ukungena edolobheni lakoBulawayo bevela emalokitshini atshiyeneyo ababikwa bebuyiselwe ezindini ngamasotsha lamapholisa izolo esithi aseqalile ukuqinisa isandla kumigoqo yokwenqabela ukumemetheka kwegciwane leCoronavirus.
Amasotsha lamapholisa la abikwa ebedlulisa abantu abalencwadi ezibavumela ukungena edolobheni kuphela.
Uhulumende wazise ngoLwesibili ukuthi useqinisa njalo imigoqo yokwenqabela ukuhambahamba kwabantu ngoba umkhuhlane weCoronavirus usumemetheka kakhulu.
Inani labantu abathola lumkhuhlane phakathi kwelizwe yilo elihamba phambili kulezinsuku. Ensukwini ezedluleyo abavela phandle yibo abakade bebanjwa lumkhuhlane ngobunengi.
UMongameli Emmerson Mnangagwa laye ugcizelele izolo ukuthi uzakwethula iziqondiso ezintsha ngenjongo yokwenqabela lumkhuhlane.
Kodwa abanye bathi injongo yakhe emqoka ikhanya ingeyokuvimba ukutshengisela okuqoqwa mhlaka 31 kulinyanga ngabantu abasola uhulumende wakhe.
Kulembiko ethusela uzulu enkundleni zokuxhumana ethi engalokotha atshengisele uzawukhomba umuzi olotshwala. Akwazakali ukuthi limbiko ivela ngaphi.
Umphathintambo obona ngendaba zasekhaya, uMnu Kazembe Kazembe ubuzwe ngalimbiko edale lephalamende kanye lokuthi amasotsha atshela abantu ukuthi bengangeni edolobheni mhlaka 31 kodwa wathi kazi lutho.
Olwela amalungelo oluntu uMnu Josphat Mzaca Ngulube utshele iStudio 7 ukuthi abantu abanengi bakhanya bezisimele ukutshengisela mhlaka 31.
