Iziphathamandla zebandla leMDC Alliance labanye abalwela ilungelo likazulu sebebalekile ezindlini besesaba ukuthunjwa lokubulawa phambilini kombhikitsho okhangelwe ngolwesihlanu.
Amapholisa asethule uluhlu lwabantu athi bayabadinga phezu kombikitsho lo. Umsekeli kangcinisihlalo we MDC Alliance uMnu. Job Sikhala, umkhokheli wabatsha, uMnu. Obey Sithole lonobhala kugatsha lolu, uMnu. Gift Ostallos Siziba.
Kodwa uSikhala wethule umnfanekiso kamabonakude esithi uyasekela umbikitsho wangoLwesihlanu njalo ufuna abenza inkohlokalo.
Kuthi abanye abadingwa ngamapholisa ngowayekhokhela ugatgsha lwabatsha kuZanu PF, uMnu. Godfrey Tsenengamu, umkhokheli we Tajamuka-Sesijikile uMnu. Promise Mkhwananzi aboMnu. Godfrey Kurauone, Denford Ngadziore, Robson Chere lo Allan Moyo.
Kunjalo nje, ibandla leMDC Alliance lithi isiphathamandla sogatsha lwabatsha kulelibandla koBulawayo uMnu. Takunda Madzana ulimele kakhulu ngemva kokuthunjwa ngabantu abangaziwayo abakade behlome ngemibhobho ngoLwesine.
Isikhulumeli salelibandla koBulawayo uMnu. Swithern Chirowodza uthi uMnu. Madzana uhlukuluziwe ngokulunyathiswa amandla kagetsi enyaweni lokunye ukuhlukuluza, ngesikhathi abamthumbileyo besithi kachaze ukuthi ngobani abaqoqa ukutshengisela ngoLwesihlanu kulelidolobho.
Okunengi ngaloludaba asikuzweni kungxoxo uMnu. Chirowodza ayiqhube loSithandekile Mhlanga weStudio 7.
Ibandla leZanu PF likhuthaze abantu ukuthi bengaphatheki kulokhu ukutshengisela.
Ekhuluma emhlanganweni lentathathelizindaba izolo eHarare osaphethe isikhundla sesikhulumeli salelibandla, uMnu. Patrick Chinamasa ukhuze ummeli welemelika eZimbabwe, uMnu. Brian Nichols yisigebengu ngoba etshotshozela umvukela elizweni njalo engaqhubeka uzaxotshwa elizweni.
Ke sizwe amazwi akhe.
kolunye udaba olufanayo, omela isigaba se Binga North edale lephalamende, uMnu. Prince Dubeko Sibanda uthi uke wathwaliswanzima ngamasotsha esesigabeni sakhe ngempelaviki. Ke size ingxoxo esiyennze laye: