amalinks wokungena

Breaking News

'Umnotho weZimbabwe Ubulawa Nguhulumende Ngemisebenzi Yenkohlakalo'


Uzulu uthi uMongameli Emmerson Mnangagwa uyaphazama nxa esithi umnotho welizwe ubulawa ngamabandla aphikisayo azama ukumgenqula embusweni.

Uthi umnotho ubulawa nguhulumende kaMnangagwa ngemisebenzi yenkohlakalo.

Ekhuluma ngoLwesibili, uMnangagwa uthe inhlelo zakhe zokuvuselela umnotho ziphazanyiswa ngamabandla aphikisayo wona athi asebenza lezitha zeZimbabwe emizameni yokumsusa embusweni.

Usole njalo izijeziso athi zetheswa iliza kanye labanye athi badulisa intengo yedola leMelika ngabomu ukuze umnotho utshabalale ngamandla.

Kodwa ibandla leMDC Alliance lithi okubulala umnotho weZimbabwe yimisebenzi yenkohlakalo enziwa ngamalunga kahulumende.

Umgcinisihlalo webandla leli enyakatho yeMaNdebeleni uMnu Prince Dubeko Sibanda uthi ukuntshontshwa kwamadayimana eMarange ngumzekeliso omuhle wobuhuquluzi benziwa yilabo abasembusweni.

“Imali ephuma kulawo madayimana kayaziwa ukuthi iyangaphi. Ngakho, ukuthi basitshele ngama-sanctions bengasitsheli ukuthi ontshontsha imali ngubani akusebenzi," kutsho uSibanda.

Amazwi kaSibanda agcizelelwe ngunobhala jikelele wenhlanganiso yezisebenzi iZCTU uMnu Japhet Moyo.

"Thina esikwaziyo yikuthi okwenza unotho ungasukumi kumbe ukhuphuke yikuthi uhulumende ulobuqili... sesikhangele phela i-corruption ekhona phakathi kwelizwe," kutsho uMnu Moyo.

Ingcwethi kwezombusazwe uMnu Effie Dlela Ncube, oyisikhulumeli njalo senhlanganiso emela abathengi iNational Consumer Rights Association uthi uMnangagwa kumele azinuke amakhwapa engakakhombeli abanye ngomunwe.

"Inotho yeZimbabwe ibulawa ngababusayo, khohlwa nge-opposition, khohlwa ngeMelika, khohlwa ngeNgilandi, khohlwa ngeEuropean Union. Umnotho ubulawa ngabasezihlalweni eHarare, yibo abebayo.

UMnangagwa uthe kubalulekile ukuthi uzulu weZimbabwe ebambane ekukhuliseni umnotho kugcwaliswe uhlelo lwakhe lweVision 2030.

Ilunga leZanu PF uMnu Believe Gaule yena uthe ngempela abamabandla aphikisayo bajonge ukugenqula umbuso weZanu PF.

"Yimpi leyi abayidalayo lababantu. Bafuna kube lomsindo, bafuna ukugenqula uhulumende," kutsho uMnu Gaule.

Uhulumende yena uthi umnotho usuhlaliseka njalo lentengo yezinto isisehla. Kodwa uNcube uthi lawo ngamanga aluhlaza.

Ukuwa kumnotho kuvele sobala njalo namuhla lapho idola leZimbabwe eliqhubeke lilahlekelwa luhlonzi nxa liqathaniswa ledola leMelika emkambo osemthethweni.

Ngeviki edluleyo idola leMelika elilodwa belilingana lamadola akuleli angamatshumi ayisikhombisa lasithupha, 1:76. Kodwa namuhla idola leMelika belilingana lamadola eZimbabwe angamatshumi ayisitshiyangalombili, 1:80.

Lokhu kutsho ukuthi idola leZimbabwe lilahlekelwa yimiklomelo emine viki ngeviki.

please wait

No media source currently available

0:00 0:05:12 0:00

Facebook Forum

XS
SM
MD
LG