Ibandla leZapu lithi selihlangane labebandla elibusayo kweleSouth Africa eleANC labogatsha lwalo lweUmkhonto weSizwe kanye labebandla leSouth African Communist Party, emizameni yokuxazulula okuhluphayo kwezombusazwe eZimbabwe.
Lokhu kulandela uhambo lwequla likaMongameli weleSouth Africa uMnu Cyril Ramaphosa eZimbabwe ngoMvulo lapho elikhulumisane khona loMongameli Emmerson Mnangagwa ngodaba lunye.
Kodwa iqula leli alisahlangananga labamabandla aphikisayo kanye labalwela amalungelo oluntu ukuze lizwe eyabo imbono.
Iziphathamandla zamabandla aphikisayo labalwela amalungelo oluntu bathi bayahlukuluzwa njalo bayathunjwa babuye babotshwe mahlayana nguhulumende weZanu PF.
UMnangagwa lebandla lakhe leZanu PF bona bayakulandula lokhu besithi abangu ababotshwayo ngabazama ukugenqula uhulumende ngodlakela.
Isikhulumeli seZapu uMnu Iphithule Maphosa utshele iStudio 7 ukuthi ibandla lakhe lizaqhubeka likhulumisana labakwamanye amazwe ukuze kudingwe isisombululo kudaba lweZimbabwe.
