Umanyano wamabhishop esonto yama Roma Owe Zimbabwe Catholic Bishop’s Conference, lawo usungene kuluhlu lwabasola umbuso webandla leZanu PF.
Lumanyano wethule umbiko ngoLwesihlanu, othiwa yi pastoral letter, usithi imbiko wenhlanganiso ezibalisa iEuropean Union, African Union le United Nations osola ukwephula kwelungelo likazulu uveza sobala isimo esikhona elizweni.
Lumanyano uthi ilizwe lalahla ithuba lokulungisisa umumo lo ngokungemukeli inkulumo lenhlanganiso ezitshiyeneyo liqula likamongameli Cyril Ramaphosa wakwele South Africa. Amabishop la athi kulokwesaba elizweni, abanye bebaleka ezindlini zabo besesaba ukubotshelwa amacala angaqondakaliyo kanti ke abanye basemajele bobotshelwa izizatho ezingaqondakaliyo.
Ukuhlaziya loludaba sixoxe lengcwethi kwezombusazwe, uMnu. Bekezela Maduma Fuzwayo.
Uhulumende ulandule umbiko we Zimbabwe Catholic Bishop’s Conference esithi akuladubo elizweni.
Unobhala kugatsha lwezokwethulwa kwembiko, uMnu. Nick Mangwana utshele iphephandaba le Herald ukuthi indubo eziselizweni ngeziphathelane lezijeziso zenotho, ukungani kahle kwezulu logubhano lwe coronavirus hatshi okukhulunywa ngama bishop.
UMangwana wengezelele esithi umbiko wamabisho lo awunanzi imizamo kaMongameli Emmerson Mnangagwa eyokulwisana lenkohlakalo nanku sokubotshwe iziphathamandla zikahulumende.
