Inani lasebebulewe ngumkhuhlane weCovid-19 eZimbabwe likhwelile njalo izolo laya kukhulu lamatshumi amane lanye, 141, ngemva kokubhubha kwabantu abayisithupha.
Ugatsha lwezempilakahle luthi bonke abafileyo bebehlala eHarare.
Luthi ababanjwe umkhuhlane lo izolo njalo bangamatshumi ayisikhombisa, 70, okudale ukuthi inani lasebefunyenwe belawo kuleli likhwele liye ku5378.
Asebesindile bona bakhwele ngamakhulu aphezu kwamabili, 257, baya ku4105.
Ukukhwela kwenani lababanjwa umkhuhlane weCovod-19 kanye labafayo kuza ngesikhathi uhulumende eseyekethisa iziqondiso zokuvimba ukumemetheka kwawo.
Umphathintambo obona ngokwethulwa kwembiko uNkosikazi Monica Mutsvangwa wazise izolo ukuthi uhulumende usevumela amabhizimusi ukuthi asebenze kuze kuyetshaya ihola lesine lemizuzu engamatshumi amathathu, 4:30 ntambama.
Ngesikhathi esedluleyo amabhizimusi wonke ebevalwa ngo3:30.
UNkosikazi Mutsvangwa uthe njalo abantu sebevunyelwa ukuhambahamba kuze kuyetshaya u8 O’clock ntambama. Esikhathini esedluleyo umuntu wonke ubemele abe esengekhaya ngo6 O’clock.
Abavela kwamanye amazwe bona sebezavunyelwa ukuya emizini yabo bengahlolwa betholakale bemsulwa. Abayabe bebanjwe iCoronavirus yibo asebezavalelwa kuma-quarantine centers.
Olwela amalungelo oluntu uMnu Dumisani Nkomo utshele iStudio 7 ukuthi kunzima ukuvimba ukumemetheka kwalumkhuhlane ngoba abantu bayaminyana emabhasini lasezikotshweni lapho okukhiwa khona amanzi.
