amalinks wokungena

Breaking News

ZCTU: Imuli Yabantu Abahlanu Isidinga iZ$49,000 Ukuze Iphile Kuhle Ngenyanga


Two elderly women shop for mealie meal and other basic commodities, March 14 2019, in the Mutoko rural area of Zimbabwe. Eastern Zimbabwe receives help to fight drought induced hunger.

Inhlanganiso emela izisebenzi, iZCTU, ithi imuli elabantu abahlanu idinga imali engangeZ$49,000.00 kumbe iUS$567.00 ukuze yenelise ukuphila kuhle ngenyanga.

Le yimali ephindwe kathathu nxa iqathaniswa laleyo ebikwa nguhulumende.

Ugatsha lukahulumende olubona ngezamanani olweZimbabwe National Statistics Agency lwazise ngeviki edluleyo ukuthi imali ebisidingwa yimuli ngenyanga ephelileyo ibisikhuphukile isuka kuZ$11,000 yaya kuZ$15,000.

“Imuli idinga imali efika kuZ$49,000 kumbe iUS$567 ngenyanga. Imali ekhulunywa yiZimStats le incane kakhulu,” kutsho unobhala jikelele weZCTU uMnu Jahet Moyo.

Wengeze wathi okudanisayo yikuthi abantu abanengi sebelahlekelwe yimisebenzi ngenxa yomkhuhlane weCoronavirus kanye lokonakala komnotho, kuthi lalabo abasebenzayo abayiholi limali.

“Izisebeni ziphakathi kodubo olumangalisayo, ziphakathi kwenkinga emangalisayo. Okuba buhlungu yikuthi sibona labo abazama ukutshengisela phezu kodaba lweholo bebotshwa,” kutsho uMoyo.

Impuphu, eyiyo into ebalulekileyo kakhulu empilweni kazulu ibiza US$5 isaka le10kg kuthi i50kg yona ibiza US$25 kusiya phezulu. Kodwa intengo lezi ziphezulu emalokitshini, emadolobheni amancane kanye lasemaphandleni.

Yonke le yimali engeneliswa ngababalisi, kutsho isiphathamandla senhlanganiso yeProgressive Teachers Union of Zimbabwe uNkosikazi Nokuthula Hlabangana.

“Kuyadabula inhliziyo. Utitsha okwamanje uyehluleka khona ukuthenga isinkwa ngenxa yemali esiyiholayo,” kutsho uNkosikazi Hlabangana.

Amazwi akhe agcizelelwe yisiphathamandla senhlanganiso yabaphila ngokuthengisa iBulawayo Vendors and Traders Association, uMnu Michael Mdladla Ndiweni yena othi ngenxa yokoma komnotho, akuselanzuzo abayitholayo.

“Abantu sebephila nje ngokuthi bathenge ukudla badle mhlawumbe kanye ngelanga, yikho ke siyavumelana lokukhulunywa yinhlanganiso yeZCTU,” kutsho uNdiweni.

Lanxa inengi likhala ngokoma kwempilo, umphathintambo wezemali uMnu Mthuli Ncube lezinye iziphathamandla zikahulumende baqina ngokuthi amanyathelo asebewathethe aselethe ububelo kwezenotho ngoba intengo ayisakhuphuki mahlayana.

please wait

No media source currently available

0:00 0:05:19 0:00

Facebook Forum

XS
SM
MD
LG