Ukuvezwa kwamagama amalunga eMDC-T asekhethwe yilelibandla ukuthi angene ezikhundleni zedale lephalamende ezivuleke ngemva kokuxotshiswa kwamalunga eMDC Alliance nguNkosazana Thokozani Khupe labanye bakhe sokwengeze ukufuthelana okuvele kukhona phakathi kwamabandla womabili.
IZimbabwe Electoral Commission (ZEC) iveze ukuthi amalunga eMDC-T asesiya ephalamende abalisa uMaKhupe, Yvonne Musarurwa, Lindani Moyo, January Sawuke, Memory Munochinzwa, uLwazi Sibanda loSipho Mokoena.
Asebesiba ngamalunga edale leSenate babalisa uMolly Dorothy Ndlovu, Khaliphani Phugeni, Thamani Moyo, Getrude Moyo, Piniel Denga, Chief Ndlovu, Teti Chisorochengwe loNomalanga Khumalo.
I-ZEC yethule amagama lawa ngeviki edluleyo ngemva kokuwaphiwa yiMDC-T. Iphinde yapha uzulu ongaba efisa ukuphikisa ukukhethwa kwabantu laba amaviki amabili ukuthi enze njalo.
I-MDC Alliance ithi kuyadanisa ukuthi abantu abanqotshwa kukhetho sebesiba ngamalunga ephalamende ngemva kokuxotshisa amalunga ayo. Kodwa iMDC-T ithi yaxotshisa abantu laba ngoba bayihlamukela.
Ukuhlaziya loludaba sixhume umgcinisihlalo weMDC-T eMelika uMnu Den Moyo lesiphathamandla seMDC Alliance uMnu Tim Muringai.
Siqale ngokubuza uMnu Muringai ukuthi kukhona na abangakwenza ngaloludaba.
