abantu abangaziwayo balumathise umlilo befuna ukutshisa amahofisi ebandla leMDC, iRichard Morgan Tsvangirai House, eHarare izolo ebusuku.
Omela isigaba se Highfields edale lephalamende, uMnu. Happymore Chidziva, owe MDC Alliance utshele iStudio Seven ukuthi umlilo lo ulumathiswe phandle kwentuba yamahofisi la ngabantu abathele ipetulo baklwebha umentshisi kodwa intsha yebandla esihlala emahofisini la yenelise ukuwucithsa ungamakalumathi isakhiwo.
UChidziva uthi amapholisa azisiwe. Kodwa asenelisanga ukukhuluma lamapholisa.
Kunjalo née, Ibandla leMDC-Alliance lithi liyakhathazeka ngokuxotshwa kwamalunga alo ephalamande ngeleMDC-T okulokhu kuqhubeka, kulandela ukukhutshwa kwabanye njalo abalitshumi izolo kulelidale, ngesikhathi abatsha bamacele womabili besithi kumanyanwe.
Abatsha laba bathi kufanele kuqhutshwe umhlangano wecongress owokukhetha umkhokheli oqotho kulabo ababekhona kungakehlukanwa ngomnyaka ka2014, njengalokho okwanqunywa ngumthethwandaba we supreme court.
Ezinye iziphathamandla zeMDC Alliance ezixotshwe edale lephalamende izolo zibalisa umsekeli kamongameli uNkosazana Lynnette Karenyi-Kore, umeli weBinga North edale lephalamende uMnu, Prince Dubeko Sibanda, kanye loNkosazana Dorcas Sibanda omela iBulawayo.
Okunengi ngaloludaba, asikuzweni kungxoxo uSithandekile Mhlanga weStudio 7 ayiqhube lomsekeli wesikhulumeli seMDC Alliance uMnu. Felix Magalela Mafa.
