Ibandla leZANU PF lithi aliseyikuqhuba umhlangano walo omkhulu weminyaka yonke oweAnnual Conference obukhangelelwe ngoMpalakazi, ukwenzela ukwenqabela ukumemetheka kweCOVID 19, njalo lizakwazisa abalandeli balo ukuthi umbuthano lo uzakwenziwa nini.
Lokhu kuphume emhlanganweni lentathelizindaba, oqhutshwe ngemva kowePolitpuro yalelibandla izolo ntambama eHarare, obukhokhelwa yiziphathamandla zeZANU PF ezibalisa uMnu. Patrick Chinamas, Victor Matemadanda, Tafadzwa Mugwadi, loDavid Parirenyatwa.
UMnu. Chinamasa uthe izisebenzi zikahulumende aziseyikuvunyelwa ukuphatheka kukhetho lwama District Cordinating Committees alelibandla ngoba umthetho awukuvumi.
Ukuze sihlaziye loludaba lokunye okuhlafunwe kulumhlangano, uSithandekile Mhlanga weStudio 7 uxoxe lesiphathamandla sebandla leZANU PF uMnu. Joseph Tshuma, yena oncome phose zonke izinqumo ezithethweyo, ngaphandle kwesokuthathela owayelilunga lalelibandla uMnu. Kudzanani Chipanga ipulazi.
