Amapholisa izolo angenele amakhansila eHarare buthumuthumu ephakathi komhlangano wekhansili abopha amakhansila angamatshumi amabili kanye lentathelizindaba ezine ebeziyethapha indaba kulumhlangano.
Lanxa umsakzo weStudio 7 wehlulekile ukuxhumana lesikhulumeli samapholisa uMnu Paul Nyathi ukuze sizwe isizatho sokubotshwa kwawo, amakhansila la abikwa ebotshelwe amacala enkohlakalo asukela ekuthengisweni kwezitanda zikamasipala.
Inhlanganiso yeZimbabwe Lawyers for Human Rights ithi intathelizindaba ezibalisa uTakunda Mandura oweOpenParly, uMunashe Chokodza owe263Chat, uBlessings Chidhakwa oweHerald loRukudzo Masira, zibuye zakhululwa.
Amakhansila abotshiweyo la ngawebandla leMDC .
Lanxa iZanu PF isithi amakhansili akhokhelwa yiMDC akhohlakele, abebandla eliphikisayo bathi uhulumende udinga indlela zokudiliza ibandla labo.
Ukuhlaziya loludaba sixhume umeli weSoutherton edale lephalamende uMnu Peter Moyo.
Kusenjalo, owayengukhansila weDzivarasekwa osanda ukumiswa umsebenzi libandla leMDC-T, uMnu. Thamsanqa Gilbert Hadebe, utshele uSithandekile Mhlanga weStudio 7 ukuthi ukhuluma lamakhansila la, esekhuliliwe.