Iziphathamandla zikahulumende weleMelika, ezibalisa umka Mongameli, uMelania Trump, zikhuthaza umongameli Trump ukuthi avume ukuthi usenqotshiwe kukhetho kodwa yena ubikwa esemba phansi esithi vele kayindawo.
Kodwa uMelania uphinde waloba enkundleniye Twitter izolo esithi kumele impumela yalelukhetho ibalwe kakutsha.
UTrump ubikwa eqoqa imihlangano yama rally ahlose ukukhuthaza abalandeli bakhe ukuthi bamsekele ekuphikiseni impumela yokhetho.
Abanye abamkhuthaza ukuthi engavumi impumela yalolukhetho ngumkhokheli wedale le Senate uMnu. Mitch McConel. Inkulungwane zabaseko bakhe bezitshengisela kuzabelo ezitshiyeneyo besithi ukhetho aluqutshwanga ngemfanelo.
Sikhuluma nje amagqwetha kaTrump asethulele umthethwandaba izikhalazo zakhe ngekhetho ezibalisa ukuthi kwasetshenziswa amabizo abantu ababhubhayo lokuthi iziphathamandla zokhetho lwakhe zavinjwa ukuhlola ukubalwa kwamavoti lezinye izikhalazo.
Kodwa ingcwethi kwezokhetho zithi akula bufakazi. Amavoti elokhu esabalwa kodwa impumela ekhona ikhomba ukuba engaze ebalwe aphele uMnu. Joe Biden uyabe ekhokhela.
Omunye wabatshayele ihlombu uMnu. Biden izolo nguwake waba ngumongameli, uMnu. George W Bush. Ibandla leMDC Alliance lithi okwenzakalayo kweleMelika kwezokhetho kuyangcomeka.
Sixoxe lomsekeli wesikhulumeli sebandla leli, uMnu. Felx Magalela Mafa othi zinengi izifundo ezingathathwa ngeleZimbabwe.
