Abezomkhathi bathi izulu lilakho ukuna ngokulingeneyo lonyaka kodwa abalimi bathi kulakho ukuba lendlala ngomnyaka ozayo ngoba intengo yenhlanyelo lemvundiso idla phezulu. Lokhu kulakho ukucobodisa umnotho welizwe wona ogxile kwezokulima.
Isaka lenhlanyelo yomumbu eliyisilinganiso sama kilogram angamatshumi amabili lanhlanu, 25, sibiza imali engamadola afika phose inkulungwane eziyithoba munwe munye, Z$9 047.
Isakhamuzi seGwanda, uMnu. Thandeko Zinti Mkandla, njalo oyingcwethi kwezombusazwe, uthi amalungiselelo okulima awalonyaka alukhuni.
Lokhu kugcizelelwe yisakhamuzi sesigaba seMatabeleland North eDete, uMnu. Stanley Torima, ongukhansila njalo kodwa othi bakhona abaphiwe inhlanyelo nguhulumende.
Isakhamuzi sesigaba seMatabeleland South, uMnu. Solani Njemnyama Moyo, ongumgcinisihlalo webandla leMDC Alliance kulumango, uthi lanxa inkomo zicakile abantu sebelima besebenzisa uhlelo oluthiwa ngugatshompo njalo inhlanyelo iphiwa ngobandlululo, kuphiwa amalunga ebandla leZanu PF kuphela.
Ingcwethi kwezokulima, uMnu. Mandla Nkomo uthi abantu balakho ukusebenzisa inhlanyelo abalayo kuleyokuthenga.
Uhulumende ulohlelo lokuphathisa abalimi oluthiwa Pfumvuza kumbe Intwasa.
