amalinks wokungena

Breaking News

Sebengu-551 Asebebulewe yiCovid eZimbabwe Kulandela Ukubhubha Kwabangu-23 Izolo


Coronavirus, Zimbabwe

Kubhubhe abantu abangamatshumi amabili lantathu, 23, ngeCovid-19 eZimbabwe izolo njalo kwatholakala abafika phose inkulungwane, 942, belomkhuhlane lo.

Lokhu kukhweze inani lasebebulewe ngumkhuhlane lo kuleli laya kumakhulu amahlanu alamatshumi amahlanu lanye, 551.

Asebebanjwe lumkhuhlane bona bakhuphuke baya kunkulungwane ezedlula amatshumi amabili lantathu, 23,239.

Phakathi kwababhubhe izolo abayisikhombisa ngabedolobho lakoBulawayo kuthi abanye njalo abayisikhombisa ngabeManicland.

Edolobheni leHarare kulababili; abahlanu eMashonaland Central kanye lababili eMasvingo.

Ukukhwela kwenani labafunyanwa belomkhuhlane lo labafayo kuza ngesikhathi izakhamizi zemaphandleni zikhala ngokuthi azisenelisi ukufinyelela amadolobho lezibhendlela ngenxa yeziqondiso zokuvalwa kwelizwe emizameni yokwenqabela ukumemetheka kweCovid-19.

Umqondisi wenhlanganiso yeRural Communities Empowerment Trust, uMnu Vumani Ndlovu utshele iStudio 7 ukuthi kwezinye indawo izakhamizi sezisesaba lokuya emasimini ngoba zivinjwa ngamasotsha lamapholisa.

please wait

No media source currently available

0:00 0:02:51 0:00

Facebook Forum

XS
SM
MD
LG