Uhulumende izolo wethule umbiko omutsha echasisa ukuthi uyayihlonipha imithethwandaba yelizwe lanxa engavumelani lokukhutshwa kukaMnu Luke Malaba esikhundleni sokuba ngumahluli omkhulu yiHigh Court.
Umbiko lo ubutshiyene kakhulu lombiko owethulwe ngumphathintambo wezemithetho uMnu Ziyambi Ziyambi yena ochothoze abahluli abethule isinqumo lesi esithi basetshenziswa yizitha zeZimbabwe.
UZiyambi uchothozwe ngabantu abanengi phezu kwamazwi la kanti lamagqwetha lawo acine elobela enkantolo esithi kumele abanjwe ngecala lokweyisa imithethwandaba.
Kodwa kumbiko wayizolo unobhala kugatsha lwezemithetho, uNkosikazi Virginia Mabhiza uthe bayayihlonipha kakhulu imithethwandaba kungelani lokuthi abavumelani lesinqumo sokususa uMalaba esikhundleni.
Ukuhlaziya loludaba sixoxe locubungula ezombusazwe uMnu Mbuso Fuzwayo.
Siphinde saxoxa lomsekeli wesikhulumeli sebandla leMDC Alliance uMnu. Felix Magalela Mafa Sibanda othi isigwebo somthethwandaba we High Court sitshengisa ukuthi bakhona abahluleli abangelami hlangothi.