Amapholisa asebophe uHatirarame Momberume obikwa wayethethe intombazana eleminyaka elitshumi lane owabhubha ebeletha eMarange esigabeni se Manicaland ngenyanga ka Ntulikazi.
UMomberume, owokholo lwesipostoli, ubekhangelelwe ukumiswa emthethwandaba eMutare ngoLwesine kodwa kasayanga ngoba amapholisa esithi asacwayisisa loludaba. Usekhangelelwe ukuya emthethwandaba ngoLwesihlanu.
Isikhulumeli samapholisa, uAssistant Commissioner Paul Nyathi uthe untombazana owabhubhayo ngu Anna Machaya hatshi uMemory Machaya njengalokhu obesekusabelele enkundleni zokuxhumana.
UNyathi uthi amapholisa afuna ukubopha uyise womuyi, uEdmore Machaya loNkosikazi wakhe, uShy Mabika ngoba baqambela amapholisa amanga ngomnyaka wokuzalwa kwakhe.
Kusenjalo, abenhlangothi ezitshiyeneyo bakhuthaza ukubunjwa kwequla lengatsha zikahulumende ele Inter-Ministerial Taskforce ukuthi zisebenzisane ukulwisana lokuqeda udubo lokwendiswa kwabantwana besithi ngoba ukutshiya lumsebenzi usenziwa ngabogatsha olulodwa njengalokho okwenzakala eZimbabwe kungasebenzi.
Lokhu ngokunye kokuphume emhlanganweni wokukhulumisana ngendleala zakulezi insuku ye ZOOM oqoqwe ngabenhlanganiso yezifundi zemkolitshini lema University ye Female Student Network Trust wokudinga indlela zokuqeda udubo lokwendiswa kwabantwana ngaphansi kwesihloko esithi ENDING CHILD MARRIAGES IN ZIMBABWE: UNRAVELLING CULTURAL AND RELIGIOUS MALPRACTICES.
Isiphathamandla sogatsha lwezabesifazane, ukuhlalisana kukazulu ukuthuthukiswa kwamabhizimusi amancinyane laphakathi laphakathi olwe(Women Affairs, Community and Small and Medium Enterprises Development) ebesiyingxenye yalumhlangano umnumzana Ernest Chimboza yena ongu Harare Metropolitan Provincial Development Officer - PDO uthi bona njengabogatsha sebenze elabo ihlandla edabeni lokulungisa imithetho yokuqeda udubo lokwendiswa kwabantwana, bayakwethulela abogatsha lwezemithetho lokwenzakala edale lephalamende.
“Njenabogatsha, sesenze imikhankaso yokuba kubekwe imithetho elukhuni, ezokwenza bajeziswe kanzima abatholakala belecala lokwendisa abantwana. Ingqobe isikwabogatsha lwezemithetho abazomele benze ihambelane leyo mithetho. ”
Kungalesi sizatho ke omunye wabangene lumhlangano, umqondisi enhlanganisweni ye The Aids and Arts Foundation - TAAF Zimbabwe umnumzana Emmanuel Gasa eqonqosele kwezokubunjwa kwequla labaphathintambo bengatsha ezitshiyeneyo ukuluxazulula loludaba lokwendiswa kwabantwana abantu becatsha ngokholo langemikhuba yesintu.
“Ngiyawusekela umbono wokuthi kubunjwe leliqula lengatsha zikahulumende okuzokwenza ugatsha lunye ngalunye luzibeke umlandu wokubona ukuthi kukhona elukwenzayo kwezokuqeda udubo lwekwendiswa kwabantwana kulelilizwe. Hatshi ukulindela abogatsha lwezabesifazane, ukuhlalisana kukazulu ukuthuthukiswa kwamabhizimusi amancinyane laphakathi laphakathi ukukwenza lokho. ”
Esinye isifundi esikolo semfundo yaphezulu se University of Zimbabwe efundela izifundo zokusiza abanye zokuba nguSocial Worker unkosazana Molyne Mukonowasha othanda ukwaziwa ngelokuthi Madzimai Molyne olilunga le Jowane Masowe eChishanu eyisiphathamandla njalo enhlanganisweni ye Female Student Network Trust thi ukholo seluphazamise impilo yamantombazana.
“Ngiyajabula kakhulu ukuba yingxenye yalo mhlangano njengelunga le Jowane Masowe eChishanu njalo ngizimisele ukutholiswa ulwazi oludingakalayo oluzongisiza ekuthini ngibe yisikhulumeli sabanye bami ebandleni lami abanganelisi ukuzikhulumela, nganelise ukusiza abanye abayabe bebhekane lobunzima. ”
Umqondisi wenhlanganiso ephatheke kumikhankaso yokufundisa uzulu ngesisekelo sombuso eye #This Constitution, uNkosazana Abigial Mupambi uthi isehlakalo sakoMarange siyadanisa kakhulu njalo ekhangelele ukuba abaphatheka kikho labalokhe belandela lumkhuba wokwendisa abantwana, bezojeziswa kanzima.
“Sibuhlungu njengesizwe, njengabomama. Sidinga ukuthi i-justice lapha kufuze ibonakale. Sidinga ukuthi umthetho lapha usebenze njengomthetho, kakho umuntu ophezu komthetho. ”
Abenhlangothi ezingene lumhlangano bathi okwenzakalayo kungasi mendo kodwa kuyikudlwengulwa kwabantwana njengoba beyabe beleminyaka ephansi kakhulu bekhuthaza ukubunjwa kwemithetho ezakwenza bagwetshwe kanzima abatholakala belandela limithetho ephazamisa impilo yabantwana kakhulu amantombazana.
